TIPRAJWK BWRUI NO SAK TANGMA KOKNO RWGUI BOLAIKHA AGARTALA HOTAL SONAR TORI O

Agartala ni police Headquarter ganao tongnai Sonartori Hotelo kainwi bodol ni bisingo choprolaimani nukjakha, tei a choproplaimung aswk kotor wngkha Hotel ni kwbangma manwi khunwi suduno swbai sukrub pairwlaikha tei khoroksa bwrwini sakaobo samung sitra tangjakha, 

Hotel Sunar tori o Baar khulokmani jorani simino kwbangma bisi romwino omo hai hamya patimung wngwi phai tongo phiya haphang ni naimwthangrog siui nugui tongwibo jai khaiya.

Hasteo kwtal haphang phaima yagulono Baar khulokna permission rwjakha Hotel Sonar Tori o, phiya hotel naikolphang rok ni bwkhaktwi jai jai kheno Baar chalogwi manlaiya, salbrum no sikla - sikli mang kuplung haikheno hasteni tongdal no sudu dera rwi khibikha.

Koktisal ni horo Baar bisingono khoroksa borokni hamjakma bwrwi ni sago yak nangmano kitingwino bulai toklai ni patimung, patimungo Battala tei West Thanani kwbangma Police bodol nawi habwilaikha, patimung no twi Sonar tori Hotel ni Manager soi kok phirokmung rwna soiya tamni hinba bini chubachu baino wngmani  omohai patimungrog.

Tabuk Sinai nuknai wansuk kwrwngrog khe naio omohai hamya samung tangkakma thairok no mwthagwi rwnani no wngthun.

Teibo kwbang musok bwsa achai rwnani

Thanai 2020-21 bisi ni rangbai Pradhan Montri Gudhan Prakash project ni samung 97% success nukjakha

Thanai bisio no a scheme ni samung Chenjakmani tei aboni naharmung wngkha, musuk( cow) no kubun raida twi khe sak kuplung khaiwi Dudh ( milk) kwbang manthokrwnani.

Teibo kwbang musok bwsa achai rwnani tei musok chwla achai rwnanokhe komi rwi tubunani bagwi design swnamjakha.

Phainai bisirogono chwng dudh kwbang swnama bisingtwi sak sak bachai malai manai.

Thinangobo hasteo dud pai phal bangma logi logi kubun hasterogobo dudh ni baniya khai mananw.

Cha salo Abhoi nagaro malmata hamkrai bedek ni Coldstorage tei Batenary medicine store no phiyokgwi rwkha Montri Bhagwan Das, manjakha Pochim Jela ni President Antara Deb Sorkar no khobwi tei kwbangma nograirogrog chati phwnangwi pandano chengwi rwjakha.

Kwtal cold store phiyokgwi paima ulo hasteni montri Bhgawan Das kokthumnairok bai malai kok sakha Barot ha kotoro " Pradhan montri gudhan " mungwi a project no songchakha hasteni montri okra Biplab kumar Deb a project haste gwnangwino pirjakha aboni bagwino tabuk a project ni samung bangrwrwk wng tongo. Bo teibo sakha Pochim jela o cold store Kendra khulokjakha abobaino kwbangma sakhamya malmata bo tonoi manai tei kwbangma malmata hamkrai bedekni biti braibo kwbangma thaiono sogwi rwjaknai haikheno kwbangma hukbar khainai tei je borok musok rinai rog borokni belai kaham wngnai hinwi sakha. Cha salo Aboinagar ni malamata bedekni Coldstorage Medicine Store no gurioi berai naikha Montri Bagwan Das.

Jayanta

Surendra Reang kami thang naikha building construction ni samong Mj Suchitra Debbarma

Kraksalo Dhalai Hangkorni Mohon Kumar Jaganathpur BCL o Surendra Reang Para Ambassa RD Block ni kwtal Building ni samung no naina thangkha, Ambassa ponchayet somiti chairman Sucitra Debbarma logi o tongo hoda hamkraini samung tangnai borom gwnang Amit Reang, Kunal Debbarma, Kishan Debbbarma tei kubunrogbo.

Edited By Jayanta

Alongo thwikha khoroksa Jamal Husain mwngui khoroksa borok

Haino hai Hasteni sunamura thanani Alongo thwiokha bisi thamchiba umorni Jamal Husain mungwi khoroksa borok.

Bini nok Sunamura Thanani Boler depa amchaio. Thanai hor n dam sa katwisa o Sunamura thanani police 2016 bisini patimung N.D.P.S no phwnangwi bono romwi tubumani sunamura thanao, romna phru bini nukhung ni borokrogno chopropkha police naimwrhangrok hinwi kok silsamung romjaknai ni nukhungni borokrok ni.

Phiya police ni phaisingtwi koktwma manmani khe Jamal Husain no thanao romwi tubuma yagulo belai bohok sajakmani haini bagwi melagarh ni sak ham nogo phungui teisa thanao tubujakha.

Phungo Jamal Husain ni nukhungni borokrog bo bai malaina naimani nukhung ni borokrogno malaina rwliya  Sunamura thanani police. Yangle phungono Jamal Husain ni langma chomani koktwma manmani. Phungo haino hai Hospitalo twlangjakmani sak nainairog Jamal husaino langma chokha hinwi saklai rwkha, phiya swngmung tabuk tangwi bahaikhe  boni langma chona nangkha, betlai bu tok khaima bagwino boni langma cho o hinwi nukhung tei amchaini borokrogni koksilsa mung. 

A thwimungno twi amchaio kok erlaijak tabuk. Nukhungni borokni Jamal husain ni soi buj man na naisinglaijak.

Edited by Jayanta 

Class 8 Pori tongnai kotok dwkhui rui thui na nangkha

Rwng nok ni Girls Hostel ni tukuma nogo kotok soroi thwio kha khorosa rwng rem char swrwngwi tongnai swrwngnaijwk Emon Debbarma, Patimung Teliyamura thanao khobjaknai Korkori amachaini Assam Rifle Camp ganani Bloom Advantage High Schoolo

Patimung no twi saimankha Kwrak salo rwng nogo Offlineo English amjokmung wngtongmani,

haikeno amjokmung hallo phrwngnai tei phrwngnaijwk haphaima logi logi no mokolo kwlaikha amjokmung wng tongjora o nokol khaiwi swimani swrwngnaijwk Eman Debbarma , ulo phwrwngnairog nugui bono exam hall ni kari rohorjakha, yagulo a swrwngnai jwk khao dukhu habwi hostel ni Bath roomo kotok soroi sak sak no langma nakha.  Ulo rwngnokni phwrwngnai rog nugui koktwma rohorkha Teliyamura thanani police no. Police  Mang kwthwino kariui post moderm ni bagwi hospital rohorwi rwkha.

Edited By Jayanta

Agulini Khrisnanagar o tongnai Laxmi Bai Smriti Brwirok tongthai

Hoda hamkrai tei hoda rwng bedek bai naikoljak Agulini Khrisnanagar o tongnai Laxmi Bai Smriti Brwirok tongthaio kwdwkma sal romwi kwbangma jwngjal manjakgwi tongmani tongthaini Brwirog, 

Swrang salo kokthumnairokbai malwi bwrwi tongthai nok ni joto jwngjal no twi sai khwna rwkha.

Borok sakha kwbangma jorani simi belai k twini jwngjal kwlaijak tei current ( chwng pherqng) bo  kwrwi hamya wngma ulo swnamwi rwjakliya tabuk sak jora. Twi tank kotor kaisa tobgmabo belai hamya sitra wngjak.

A tongkhor gana kaisa bukcha thai tongo a bukcha thaibo bolong kutuk khajak tabuk, jesa jora phano bolongni chibuk tongthaio habwi mano koksilsamung Brwirokni.

Aswk jwngjalrogno samung charwna bagwi waire wai haphang bedek ni thani saui koimung bwlai rwibo mungsa samungbo chayakho.

 Haini bagwi kokthumnai rogno ringwi kha dumung phunukna nangkha tini, daktino borokni jwngjalno samung charwna wngthung haphang tang bedek.

Edited By Jayanta